تجارب الطلبة - دينا دلول تكتب عن تجربتها الدراسية في لندن
2020-10-21
مرحباً ويعطيكم العافية
اسمي دينا دلول وفي هذا المقال هحكيلكم عن تجربة الدراسة في بريطانيا:
درست في جولدسميثس وهي واحدة من الكليات التابعة لجامعة لندن (Goldsmiths, University of London) وموجودة بمنطقة حيوية جداً اسمها New Cross والمعروف عن جولدسميثس هو إنها واحدة من الكليات الرائدة في تخصصات المجالات الابداعية والثقافية. جولدسميثس بتوفر تخصصات في مجالات الآداب والعلوم الانسانية ومن تخصصاتها الإبداعية والثقافية: الفن، التصميم، الصحافة، الموسيقى، والتمثيل.
أنا حصلت على منحة Goldsmiths Humanitarian Scholarship والتي تُقدم لطالبين من فلسطين كل سنة. درست تخصص ماجستير Multilingualism, Linguistics & Education للعام 2018-2019.
لو بدي أحكي عن كل جوانب التجربة الكلام مش هيخلص، عشان هيك راح أركز على جوانب معينة من تجربتي وإلها علاقة بتخصصي مع العلم بإنه كل الأسئلة اللي ممكن تخطر عبالك سواء بخصوص الكورس او الجامعة أو القبول الجامعي موجودة إجاباتها على موقع الجامعة.
المقال مقسم لعدة أجزاء: مرحلة ما قبل الدراسة، التجربة الدراسية، الأنشطة اللامنهجية، وأخيراً مرافق الجامعة بشكل عام.
قبل البدء بالدراسة:
طبعاً المشوار يبدأ بالقبول الجامعي خاصة لو بدك تقدم للمنحة لأنها تشترط الحصول على قبول جامعي. وانت هيك هيك مش هتقدر تقدم للمنحة إلا من خلال إشي بيشبه بوابة الطالب عنّا اسمه MyGoldsmiths وهادي البوابة ما بيصيرلك آكسس عليها إلا لما تسلّم طلب جامعي ويصيرلك صفحة طالب عندهم. المهم إنه القبول مش اشي صعب طالما انت مستوفي شروط الإلتحاق بالكورس ومقدم بدري لأنه مرات بيسكروا باب قبول الطلبات في حال استلموا عدد كافي من الطلبات للتخصص. طبعاً هتتفاجأ بكيف الجامعات، ومش بس جولدسميثس، كتير متعاونين وبردّوا على كل الإيميلات والاستفسارات ومش ممكن أبداً يطنشوا أي سؤال وبحاولوا يساعدوا بكل الطرق الممكنة. يعني لو عندك أي سؤال بخصوص الكورس أو القبول ما تتردد بالتواصل مع الكلية أو مع قسم القبول Admissions.
مثلاً لما طلعتلي المنحة كان قدامي فقط 6 أسابيع أجهز للسفر وأقدم للفيزا وعشان أقدم للفيزا كان لازم أطلب من ال Immigration Office في الجامعة يطلعولي إشي اسمه CAS Statement واللي بكون فيها Reference Number لازم أعبيه بطلب الفيزا. الستيتمنت هادي عادةً بتاخد 3 أو 4 أيام عمل وبوقت كتير حرج زي هداك كان اليوم بيفرق معي، قدمت طلب ال CAS وبنفس الوقت بعتلهم وبعتت للقسم ولمنسقة المنحة ولكل حد ممكن يساعد إيميل وشرحت الوضع وظروف السفر وقديش مهم أطلّع الفيزا بأقرب وقت عشان أعرف اطلّع تصريح سفر (عملتلهم وجعة راس يعني) لأنه تصريح معبر إيريز/بيت حانون أصعب من الفيزا نفسها (هنا يجدر الذكر إنه القنصلية البريطانية ما بتتدخل بالتنسيق ع إيريز/بيت حانون لطلاب منح الجامعات اللي زيي، وهادا اللي بخلي موضوع السفر من إيريز/بيت حانون شوية صعب) المهم ما قصروا وضلهم متواصلين معي طول اليوم وإيميلات رايحة و جاية وكانوا متفهمين وصبورين لأبعد حد وتاني يوم الصبح كانت الستيتمنت واصلاني.
لوكنت محظوظ ووصلت بريطانيا قبل موعد دراستك وشفت البلد شوية و دورت على سكن وسكنت وبدأت دوامك من أول الفصل عادي هتحضر في الجامعة حاجة اسمها Induction Week، أنا وصلت متأخرة أسبوعين فما حضرت الإندكشن بس بشكل عام هو أسبوع تحضيري بتتعرف فيه على الجامعة وكلياتها و قسمك والمدرسين والزملاء وكمان مرافق الجامعة ومن أهمها المكتبة، بكونوا عاملين جدول لجولات منظمة في المكتبة على مدار الأسبوع عشان تتعرف على أقسامها وكيف تبحث عن الكتب و المراجع فيها، وكمان بتتعرف على ال Societies (student groups) الموجودة في الجامعة عشان إزا بتحب تنضم لأي واحد منهم حسب اهتماماتك كنوع من النشاط اللامنهجي. وطبعا هالأسبوع فرصة كبيرة تكوّن صداقات وتقابل طلاب من خارج تخصصك. كثير ناس بكوّنوا صداقات من خلال مشاركتهم بأنشطة الإندكشن ويك وخاصة إنه غالبية الطلاب بكونوا دوليين وجداد عالجو والبلد ومنفتحين لتكوين صداقات مع الغير.
التجربة الدراسية:
بشكل عام هي تجربة غنية جداً، المحاضرين في القسم هم مجموعة من الأكاديميين من مختلف الدول ومتميزين بمجالاتهم ودائماً على إطلاع بآخر تطورات الأبحاث والدراسات في مجالهم، هذا غير عن إنه إلهم الكثير من الأبحاث والدراسات المنشورة بمجلات عالمية.
علاقة المدرسين بالطالب علاقة ودية لطيفة فيهاش أي رسميات أو تكلف يعني بتنادي الدكتور باسمه (هادا كان بالنسبالي صدمة ثقافية) وبتشرب قهوتك بالمحاضرة عادي. أعداد الطلاب في برامج القسم اللي درست فيه بتكون عادة قليلة، كنّا 12 طالب في برنامج الماجستير, وهادا يعني وقت أكبر للنقاشات والأنشطة و مساحة أكبر في المحاضرة للتعبير عن رأيك وفرصة لكل شخص يحكي أكتر من مرة. وكان التقييم في كل مادة من خلال بحث بتكتب عنه مقال (essay) من 5000 كلمة ويتم تخصيص two one-to-one sessions لكل طالب مع مشرف المادة، كل لقاء مدته نصف ساعة، واللقاء بكون الك عشان تتناقش بكل الشغلات اللي عندك عليها تساؤلات بخصوص بحثك.
من الشغلات اللي كنت بتمنى لو إنها تكون شوية غير هو نظام المتابعة مع الطالب. مثلاً بجامعات تانية غير السيشنز هادي الطلاب بسلموا عالأقل draft وحدة سواء لل essays اللي بتنعمل خلال السنة أو للرسالة ويتم قراءة المسودة والتعليق عليها من ال personal tutor أو المشرف. ولكن في جولدسميثس أو عالأقل بتخصصي الطالب ع راحته أكتر وبيحصل على feedback مفصّل بعد الإنتهاء من البحث والتسليم. بس أكيد لما تاخد فيدباك على مسودة أولى على الأقل هادا الإشي بساعدك على تطوير مهارات البحث أكتر وكمان بيزيد من إحتمالية إنه تاخد علامة أفضل من لما تسلّم شغلك مرة وحدة وأخيرة.
Go Abroad (Erasmus)
جو أبرود هو من الأقسام اللي أضافت كتير لتجربتي الدراسية وهو قسم بوفر تمويل من إراسموس لفرص تبادل في الخارج سواء عن طريق الدراسة أو العمل وبتكون جزء من برامج البكالوريوس أو الماجستير. حصلت على فرصة تبادل Study in Brazil Scholarship لمدة 3 شهور في صيف 2019 عن طريق جو أبرود و القسم اللي كنت ادرس فيه، يمكن في منكم مستغربين إنه برنامج ممول من إراسموس والفرصة بأمريكا الجنوبية مش أوروبا ولكن هادي كانت أول تجارب الجامعة لتوفير تمويل من إراسموس لبرنامج مش في أوروبا، الفرصة كانت ضمن تعاون أو مشروع بين جولدسميثس و The Federal University of Bahia, Salvador, Brazil بإشراف من أكاديميين في قسم اللغة الإنجليزية في الجامعتين. والهدف من التبادل هو تجميع قاعدة بيانات لهادا المشروع عن طريق طلاب التبادل على مدار 3 سنوات. وإلى جانب دوري ك research assistant عملت data collection خاصة بالمشروع، كمان عملت البحث research الخاص برسالتي للماجستير واللي موضوعها يندرج تحت موضوع المشروع الكبير واللي فكرته باختصار هي دراسة لأي مدى مدرسين اللغة الإنجليزية في البرازيل بيستخدموا أساليب تربوية تشجع الطلاب على التفكير الناقد أو دراسة اللغة من منظور نقدي.
هدفي من ذكر هادا البرنامج (واللي بعتبره من ال highlights لتجربة السفر كلها بشكل عام) هو إني أنصحكم بإنه تستغلوا كل الفرص اللي زي هيك، أو بالأحرى انتو دوروا عليها, اسألوا مثلا الكلية ايش فرص التبادل المتاحة. تجربة البرازيل كانت مختلفة جداً عن تجربة لندن في كل النواحي وضافتلي كتير كتير من ناحية أكاديمية واجتماعية وشخصية. أعطتني خبرة كبيرة في مجال البحث العلمي وهادي الخبرة والمهارات هتكون منفعتها كبيرة كتير في أي دراسات عليا مستقبلية. هالتجربة كمان فتحتلي الأبواب لتجارب تانية ما عمري حلمت فيها. يعني وجودي في بلد كبيرة جداً وبعيدة أكتر من 13 ساعة بالطيارة عن لندن خلاني بدي أكتشفها أكتر وأكتر وأستغل أي فرصة سفر جوا البلد لأنها من الفرص اللي بتصير مرة وحدة في العمر، سافرت على عدة جزر ومدن في ولايات تانية في البرازيل. طبعاً كل مكان كان فرصة للتعرف على ناس جداد ومشاركتهم أنشطة وتجارب لا تنسى.
الأنشطة اللامنهجية:
في كتير أشياء تعملها خارج إطار الدراسة ومن ضمن هالأشياء هو إنه تنضم للمجموعات الطلابية (societies) اللي بتناسب إهتماماتك. في بجولدسميثس أكتر من 100 سوسايتي منها مثلاً Anime & Games Society, Amnesty International Society, Comedy Society, Creative Writing Society, Fashion Society, Gardening Society, Islamic Society, Halal Food Society وكتير كتير غيرهم.
في كمان Palestine Society نشيط نوعاً ما، استقبلوني لما بدأت أداوم في الجامعة وحاولوا يخففوا من الضغط والرهبة اللي كانوا موجودين بأول السنة. بيعملوا أنشطة خلال السنة مثلاً كانوا كتير نشيطين بأسبوع الأبرتايد Apartheid Week وعملوا فعاليات منها عرض أفلام فلسطينية وعمل دروس دبكة واقامة جلسات أدبية وشعرية وغيرها من الأنشطة.
طبعاً موجود مجموعات طلابية زي هيك بكتير من جامعات بريطانيا ولكن أنا حبيت أذكر الباليستاين سوسايتي في جولدسميثس لأنه كان إلهم دور كبير مع إتحاد الطلبة (Students Union) في جولدسمثس بإنهم يضغطوا عالجامعة يعيدوا النظر بموضوع المنحة المذكورة ويرجعوا يوفروها تاني بعد توقيفها لمدة عام (2019-2020).
الحرم الجامعي بشكل عام:
جولديمثس هي كلية صغيرة وصغر حرمها الجامعي بخليها friendly كتير، جامعة لندن بتحكي عنها 'small but mighty'. المهم صغر حجمها لا يعني إنها تنقص عن غيرها بمرافقها وخدماتها. فيها كل المرافق اللي بيحتاجها الطالب سواء لأغراض أكاديمية أو ترفيهية واللي من ضمنها مكتبة مفتوحة 24 ساعة، نادي رياضي، كافيهات، فرع صغير من بنك، استوديو موسيقى مجهز بالكامل، مسرح، استديوهات تصوير، غرف مظلمة وغرف مونتاج واستوديوهات رسوم متحركة وكل المرافق اللي بيحتاجوها طلاب الموسيقى والتصميم والمسرح مجهزة بالكامل.
وفيها كمان سينما Curzon Goldsmiths تذكرة الفيلم فيها ب 5 باوند للطلاب وتعتبر أرخص بكتير من السينمات العادية.
وهيك وصلنا لنهاية المقال. بتمنى يكون ساعدكم تكوّنوا فكرة ولو بسيطة عن الدراسة في جولدسميثس أو الدراسة في بريطانيا بشكل عام. وشجعكم تقدموا لمنحة Goldsmiths Humanitarian Scholarship (2021-2022)
تحياتي..
دينا دلول